مودی کے بیان‘ بھارتی مداخلت کیخلاف بلوچوں میں غم و غصہ‘ شہرشہر مظاہرے
کوئٹہ :بلوچستان میں بھارتی مداخلت کیخلاف کوئٹہ سمیت صوبے بھر میں احتجاجی مظاہرے کئے جا رہے ہیں۔ سبی‘ نصیر آباد‘ ہرنائی‘ چمن‘ ڈیرہ مراد جمالی اور دیگر شہروں میں محب وطن اور غیور بلوچوں نے بھارتی پرچم اور مودی کے پتلے نذر آتش کئے اور بھارت کو واضح پیغام دے دیا کہ پاکستان ہمیشہ متحد رہے گا۔
تفصیلات کے مطابق بلوچستان کے شہری بھارتی وزیر اعظم نریندر مودی کے اشتعال انگیز بیان پر سراپا احتجاج بن گئے۔ مختلف شہروں میں بھارت مخالف ریلیاں نکالی گئیں اور بھارتی وزیراعظم کے بیان کی بھرپور مذمت کی گئی۔
چمن میں سیکڑوں بلوچ شہریوں نے بلوچستان میں بھارتی مداخلت کی مذمت کرتے ہوئے احتجاجی مظاہرہ کیا۔ اس موقع پر شدید نعرے بازی کی گئی۔ ہرنائی میں قبائلیوں نے براہمداغ بگٹی کے خلاف بھی نعرے بازی کی۔
اس موقع پر بھارتی جھنڈا اور مودی کا پتلا نذر آتش کیا گیا۔
ڈیرہ مراد جمالی، ڈیرہ بگٹی، گوادر‘ حب‘ پشین‘ سبی‘ نصیر آباد‘ نوشکی‘ تربت‘ بارکھان‘ قلعہ سیف اللہ‘ زیارت‘ لورا لائی میں بھی احتجاجی مظاہرے کئے گئے جن میں عوام کی بڑی تعداد شریک ہوئی اور پاکستان میں بھارتی مداخلت اور دہشت گردی کی کارروائیوں کی مذمت کی گئی۔
