اسلام آباد

اسپتال میں زیر علاج حنیف عباسی کی طبیعت مزید بگڑ گئی، وارڈ ہی سب جیل قرار

اسلام آباد: ایفیڈرین کیس میں عمر قید کی سزا پانے والے مسلم لیگ (ن) کے رہنما حنیف عباسی کی اسپتال میں طبیعت بگڑ گئی جس کے بعد وی آئی پی وارڈ کو ہی سب جیل قرار دے دیا گیا۔ حنیف عباسی 5 روز سے راولپنڈی انسٹی ٹیوٹ آف کارڈیالوجی میں زیر علاج ہیں جہاں ان کی طبیعت مزید بگڑ گئی جس کے بعد انہیں کرونری کیئر یونٹ (سی سی یو) منتقل کردیا گیا۔

اسپتال ذرائع کے مطابق حنیف عباسی کو اسٹنٹ ڈالا گیا تھا اور ڈاکٹروں کی ٹیم ان کا چیک اپ کر رہی ہے۔ دوسری جانب پولیس حکام کا کہنا ہے کہ اسپتال کا وی آئی پی وارڈ سب جیل قرار دیا گیا ہے اور کسی کو حنیف عباسی سے ملاقات کی اجازت نہیں۔ پولیس حکام کے مطابق جیل کے قوانین کو اپنایا جا رہا ہے اور جیل پولیس ہی وارڈ اور سی سی یو پر تعینات ہے۔

یاد رہے کہ راولپنڈی کی انسداد منشیات کی عدالت نے عام انتخابات سے 3 روز قبل (21 جولائی) کو ایفیڈرین کیس کا فیصلہ سناتے ہوئے حنیف عباسی کو عمر قید کی سزا سنائی تھی۔ عدالتی فیصلے میں کہا گیا تھا کہ 363 کلوگرام ایفیڈرین کا درست استعمال کیا گیا جبکہ ملزم حنیف عباسی باقی ایفیڈرین کے استعمال کا ثبوت نہ دے سکے۔ واضح رہے کہ حنیف عباسی و دیگر ملزمان پر جولائی 2012ء میں 500 کلوگرام ایفی ڈرین حاصل کرنے کا مقدمہ دائر کیا گیا تھا۔

Tags

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close