سلمان خان نے اْس وقت میرا ساتھ دیا جب کسی کو بھی مجھ پر یقین نہیں تھا، شاہ رخ خان

ممبئی: بالی ووڈ کنگ شاہ رخ خان نے کہا ہے کہ سلمان خان نے اْس وقت میرا ساتھ دیا اور اداکاری کوسراہا جب کسی کو بھی مجھ پر یقین نہیں تھا۔ ایک انٹرویو میں شاہ رخ خان نے ماضی کے واقعات دہراتے ہوئے کہا ’مجھے آج بھی یاد ہے جب فلم ’دل والے دلہنیا لے جائیں گے‘ کا پریمئر ہوا تھا اس وقت میرے سب دوست میرے ساتھ بیٹھے تھے، اسکرین پر فلم کا سین چل رہا تھا جس میں میں کہتا ہوں ’راج اگر یہ تجھ سے پیار کرتی ہے تو پلٹ کے دیکھے گی، پلٹ پلٹ پلٹ‘ اس وقت وہاں موجود میرے تمام دوستوں نے تنقید کرتے ہوئے کہا اس سین کو دیکھ کر ایسا لگ رہا ہے جیسے اگر لڑکی نہیں پلٹی تو تم اسے ماردوگے جیسے بازیگر میں تم نے شلپا شیٹھی کو ماردیا تھا۔ انہوں نے یہ بھی کہا اگر تم اس فلم میں نہ ہوتے تو شاید یہ فلم زیادہ اچھی ہوتی، یہ بات سن کر میں بہت اداس ہوگیا تھا تاہم سلمان خان وہ پہلے انسان تھے جنہوں نے فلم دیکھ کر کہا یہ فلم زبردست ہے‘۔

شاہ رخ خان بھی یہ قصہ سناتے ہوئے آبدیدہ ہوگئے، اس کیساتھ ہی انہوں نے اپنی فلموں کی تمام اداکاراؤں کا شکریہ اداکیا جن کی وجہ سے انہیں ’رومینٹک ہیرو‘ کا خطاب ملا۔ کنگ خان نے کہا میں رومینٹک سین کرتے ہوئے بہت گھبراتا تھا تاہم میری ساتھی اداکاراؤں نے میرا بہت ساتھ دیا۔ چاہے وہ کاجول، مادھوری یا جوہی چاؤلہ ہو، میں ان تمام خواتین کا شکریہ اداکرنا چاہتا ہوں۔