شہزادی ڈیانا کی زندگی پر ایک اور فلم
شہزادی ڈیانا سپنسر کی زندگی پر ایک اور فلم بننے جا رہی ہے جس کی معمولی سی جھلک منظر عام پر آئی ہے۔
سی این این کے مطابق ’سپنسر‘ نامی اس فلم میں امریکی اداکارہ کرسٹین سٹیوورٹ نے برطانوی شہزادی ڈیانا کا کردار نبھایا ہے۔
کرسٹین سٹیوورٹ کی لیڈی ڈیانا کے روپ میں پہلی تصویر آج جمعرات کو شائع کی گئی ہے جس میں وہ بالکل اپنے اصلی کردار کے ہو بہ ہو دکھائی دے رہی ہیں۔
اس فلم کا سکرپٹ سٹیون نائٹ نے لکھا ہے جو دراصل شہزادی ڈیانا اور شہزادہ چارلس کی زندگی کے اس لمحے کے گرد گھومتا ہے جب لیڈی ڈیانا نے اپنی پریشان کن شادی کو ختم کرنے کا فیصلہ کر لیا تھا۔
یہ فلم اس ایک ویک اینڈ کی کہانی بیان کرتی ہے جب لیڈی ڈیانا شاہی خاندان کے ساتھ چھٹیاں گزارنے گئی ہوئی تھیں۔
دسمبر 1991 میں شہزادی ڈیانا کے اپنے شوہر شہزادہ چارلس کے ساتھ تعلقات سرد مہری کا شکار ہو گئے تھے۔ لیکن اس کے باوجو دیکھنے والوں کو حالات معمول کے مطابق ہی دکھائی دے رہے تھے۔
سینڈرنگھم سٹیٹ جہاں شاہی خاندان کی ذاتی نوعیت کی مصروفیات اور تقریبات کا انعقاد کیا جاتا ہے، وہیں سال 1991 میں بھی کرسمس کا جشن منایا گیا تھا جس میں لیڈی ڈیانا سمیت خاندان کے دیگر افراد بھی شریک تھے۔
معمول کے مطابق کھانا پینا، شکار اور دیگر سرگرمیاں جاری تھیں لیکن شہزادی ڈیانا کو معلوم تھا کہ حالات میں تبدیلی آنے والی ہے۔ شاید یہ وہی ویک اینڈ تھا جب لیڈی ڈیانا نے شہزادہ چارلس سے علیہدگی کی خواہش کے حوالے سے شاہی خاندان کو آگاہ کیا تھا۔
سال 1992 میں شہزادی ڈیانا اور شہزادہ چارلس کے درمیان علیحدگی ہو گئی تھی، لیکن طلاق اگست 1996 میں ہوئی تھی۔
کرسٹین سٹیوورٹ کی شہزادی ڈیانا کے روپ میں تصویر شیئر ہوتے ہی ٹوئٹر صارفین کے تبصرے شروع ہو گئے۔
ایک ٹوئٹر صارف کیٹلین نے ڈیانا اور اداکارہ کی تصویر شیئر کرتے ہوئے لکھا کہ ’ایک لمحے کو مجھے یوں لگا کہ یہ واقعی ڈیانا ہے۔
Kristen Stewart as Princess Diana is breathtaking and for a moment I actually thought it was Diana. The resemblance here is uncanny. pic.twitter.com/elZ4ysdlen
— Kaitlyn Red Wing 💜💓💙 (@KaitlynRedWing) January 27, 2021
ایک اور ٹوئٹر صارف نے بھی ڈیانا کی پرانی تصویر اداکارہ کے ساتھ لگائی اور دونوں کی حیران کن مماثلت پر تبصرہ کرتے ہوئے کہا کہ، خیال رہے کرسٹین سٹیوورٹ بائیں جانب والی ہیں۔
Kristen Stewart playing Princess Diana (2021) 😀👍
To be clear, KS is on the left. 😏 pic.twitter.com/8ySVf7FTtK— Celeb Crushes 75K (@celebdevotee) January 28, 2021
اس فلم کی شوٹنگ جرمنی اور برطانیہ میں کی جائے گی۔
اگلے سال 2022 میں شہزادی ڈیانا کی موت کو 25 سال ہو جائیں گے۔ اسی موقع پر فلم کی ریلیز متوقع ہے۔
