مجھے اُس انسان کی تلاش ہے جس نے گلاب کے پھول بھجوائے

پاکستان کی خوبصورت اداکارہ زباب رانا نے انکشاف کیا ہے کہ اُنہیں ایک انسان کی تلاش ہے کہ جس نے اُنہیں 300 گلاب کے پھول بھجوائے تھے۔

تفصیلات کے مطابق زباب رانا اپنی اداکارانہ صلاحیتوں کے سبب لاکھوں شائقین کے دلوں پر راج کر رہی ہیں جبکہ اُن کے تیکھے نین نقش اور بہترین فٹنس کے بھی ہزاروں مداح ہیں۔

زباب رانا کا سوشل میڈیا پلیٹ فارم انسٹا گرام پر ایک انٹرویو کلپ وائرل ہو گیا ہے جس میں وہ خود کے ساتھ پیش آنے والا ایک دلچسپ واقعہ سنا رہی ہیں ۔

زباب رانا کا بتانا ہے کہ ایک بار وہ اپنے گھر میں پہنچیں تو اُن کی گاڑی کے سامنے 300 پھولوں سے سجا لال گلاب کا دستہ موجود تھا جسے دیکھ کر وہ حیران رہ گئی تھیں، وہ گلدستہ اُن کا کوئی فین وہاں چھوڑ گیا تھا۔

انہوں نے بتایا کہ گلدستے میں ایک کارڈ پر اُن کے لئے پیغام بھی درج تھا جس میں لکھا تھا کہ آپ بہت اچھی ہیں بس ہمیشہ ایسی ہی رہیئے گا۔

زباب رانا نے کہا کہ اُنہیں یہ پیغام پڑھ کر بہت اچھا لگا کیوں کہ مداح کی جانب سے موصول ہونے والے اُس پیغام میں کوئی غلط بات درج نہیں تھی بس ایک معصوم سا پیغام تھا۔

اُن کا اپنے انٹرویو میں کہنا تھا کہ جس بھی مداح نے یہ پھول بھیجے ہیں اُن کی خواہش ہے کہ وہ ایک بار اُن کے سامنے تو آئے۔