حالیہ ڈرامے لوگوں میں شعور بیدار نہیں کر رہے:روبینہ اشرف
ہم کو سوچنا ہوگا کہ ڈرامے کے لیے صرف ریٹنگ اور کمائی سب کچھ نہیں۔
سینیئر اداکارہ، پروڈیوسر و ہدایت کارہ روبینہ اشرف کا کہنا ہے کہ پاکستانی ڈراما ساز گزرتے وقت کے ساتھ گہرائی، کہاںیاں اور موضوعات کھو رہے ہیں، ہم کو سوچنا ہوگا کہ ڈرامے کے لیے صرف ریٹنگ اور کمائی سب کچھ نہیں۔
جدید دور میں پاکستانی ڈراموں کے موضوعات پر بات کرتے ہوئے روبینہ اشرف کا کہنا تھا کہ ماضی میں پاکستانی ڈرامے ہولی وڈ اور بولی وڈ فلموں سے مقابلہ کیا کرتے تھے مگر اب حالت سب کے سامنے ہیں۔
ماضی میں ان کے جو ڈرامے مقبول ہوئے اس وقت سوشل میڈیا نہیں تھا، وہ اپنی کہانیوں اور گہرائیوں کی وجہ سے مقبول ہوئے جب کہ آج معاملہ الٹ چکا ہے۔
سینیئر اداکارہ کا کہنا تھا کہ آج ڈراموں کے موضوعات محدود ہو چکے ہیں جب کہ ان میں گہرائی بھی نہیں اور یہ کہ اس طرف دھیان بھی نہیں دے رہے۔
View this post on Instagram
روبینہ اشرف نے کہا کہ حالیہ ڈرامے لوگوں میں شعور بیدار نہیں کر رہے، وہ صرف لوگوں کو تفریح فراہم کر رہے ہیں جب کہ ماضی کے ڈرامے تفریح کے ساتھ شعور بیدار کرتے تھے۔
انہوں نے کہا کہ حالیہ ڈراما انڈسٹری کی حالت پر ہم سب کو سوچنا چاہیے کہ ڈرامے کے لیے صرف ریٹنگ اور کمائی ہی سب کچھ نہیں، ان کی کہانی اور موضوع بھی اہم ہے، کیوں کہ ان ہی چیزوں کی وجہ سے ڈرامے اور اداکار یاد رکھے جاتے ہیں۔
View this post on Instagram
انہوں نے حالیہ دور کے نئے اداکاروں کا نام لیے بغیر ان کے رویوں پر بھی بات کی اور کہا کہ سوشل میڈیا پر شہرت حاصل کرنا اور ڈراموں میں اداکاری کرنا دو مختلف چیزیں ہیں۔
روبینہ اشرف نے کہا کہ نئے اداکار سیکھنے کے عمل کو ترجیح نہیں دیتے مگر ان کے زمانے میں اداکار سینیئرز سے سیکھتے تھے۔
