آج مزارِ قائد کراچی سے پیپلز پارٹی لانگ مارچ شروع ہونے جا رہا ہے

صدر پی پی کراچی سعید غنی نے کہا کہ لوگ اپنے چیئرمین کی کال پر لانگ مارچ میں شرکت کے لیے آ رہے ہیں۔

سندھ کے وزیرِ اطلاعات کا کہنا ہے کہ کراچی سے آج شروع ہونے والے پاکستان پیپلز پارٹی کے لانگ مارچ میں شرکت کے لیے بڑی تعداد میں کارکنان کی آمد جاری ہے۔

صوبائی وزیر نے بتایا کہ بلاول بھٹو زرداری کی گاڑی کے ارد گرد ان کی اپنی سیکیورٹی اور جانثار ہوں گے۔

سعید غنی نے مزید بتایا کہ لانگ مارچ میں رضاکاروں کی بھی سیکیورٹی ڈیوٹی لگائی گئی ہے، پلان ہے کہ غروبِ آفتاب تک اگلی منزل تک پہنچ جائیں گے۔

موجودہ حکومت، مہنگائی و بیروزگاری کے خلاف آج مزارِ قائد کراچی سے چیئرمین پاکستان پیپلز پارٹی بلاول بھٹو زرداری کی قیادت میں لانگ مارچ شروع ہونے جا رہا ہے جو مختلف شہروں سے ہوتا ہوا شہرِ اقتدار، وفاقی دارالحکومت اسلام آباد پہنچے گا۔