حکومت سندھ نے وبائی امراض ایکٹ میں ترمیم کے لیے آرڈیننس لانے کا فیصلہ کرلیا

کراچی : کورونا وائرس کے پھیلاؤ کو روکنے کے لئے سندھ حکومت نے اہم فیصلہ کرلیا ہے۔

حکومت سندھ نے وبائی امراض ایکٹ2014  میں ترمیم کے لیے آرڈیننس لانے کا فیصلہ کرلیا۔ وائرس کا پھیلاؤ کا سبب بننے والے اور حکومتی اقدامات پر عمل نہ کرنے پر جرمانہ ہوگا۔

آرڈیننس میں ترمیم کے بعد کورونا کا سبب بننے والے کسی بھی فرد، افراد، ادارے پر جرمانہ عائد کیاجاسکے گا۔ جرمانہ کم سے کم دو لاکھ اور زیادہ سے زیادہ دس لاکھ روپے تک ہوگا۔

آرڈیننس کا مسودہ ستائیس اپریل کو سندھ کابینہ اجلاس میں پیش کیا جائے گا۔ گورنر کی منظوری کے بعد صوبے بھر میں نافذ العمل ہوگا۔

اس کے علاوہ کورونا وائرس پھیلاو کو روکنے کے لیے حکومتی اقدامات پر عمل نہ کرنے پر بھی یورپی و خلیجی ممالک کی طرز پر جرمانہ عائد کیا جائے گا۔

دنیا کے کئی ممالک میں کورونا وائرس کی وباء پر قابو پانے کے لئے اس طرح کے قوانین پر پہلے سے عملدرآمد موجود ہے۔ سندھ حکومت قید کی تجویز کی حامی نہیں ہے۔