Featuredاسلام آباد

دوست ملک کی پاکستان کو کووڈ-19 کی روک تھام کے لیے 95 لاکھ ڈالر کی امداد

جاپان نے پاکستان کو کووڈ-19 کے خلاف اقدامات کے لیے95 لاکھ ڈالر کی گرانٹ کردی۔

جاپان نے پاکستان کو کووڈ-19 کی روک تھام اور دیگر وبائی امراض کے خلاف اقدامات کے لیے اپنی گرانٹ میں مزید 95 لاکھ ڈالر کا اضافہ کردیا۔

جاپان کے سفارت خانے سے جاری بیان کے مطابق اس حوالے سے دستاویزات پر جاپان کے سفیر متسوڈا کونینوری اور معاشی امور ڈویژن کے سیکریٹری نور احمد نے دستخط کیے اور دستاویزات کا تبادلہ کیا گیا۔

بیان میں کہا گیا کہ یہ گرانٹ آلات اور مشینری کی خریداری کے لیے استعمال ہوگی جو طبی اداروں کو مہیا کی جائے گی۔

پروگرام کے تحت ایکسرے مشین کے علاوہ 30 اقسام کی طبی آلات پاکستان میں نیشنل ڈیزاسٹر منیجمنٹ اتھارٹی (این ڈی ایم اے) کے ذریعے ہسپتالوں کو فراہم کیے جائیں گے۔

این ڈی ایم اے نے 2007 میں اپنے قیام سے اب تک قومی سطح پر سیلاب، زلزلے، کووڈ-19 اور ٹڈی دل جیسے بحرانوں میں مؤثر اقدامات کیے ہیں۔

بیان کے مطابق جاپانی سفارت خانہ اور این ڈی ایم اے پاکستان میں کووڈ-19 کے آغاز سے ایک دوسرے کے ساتھ مل کر کام کر رہے ہیں اور طبی اداروں میں صف اول میں کام کرنے والے عملے کو پہلی ترجیح دے رہے ہیں۔

اسلام آباد میں منعقدہ تقریب میں جاپان کے سفیر نے واضح طور پر کہا کہ ہماری گرانٹ سے نہ صرف کووڈ-19 کی روک تھام کے لیے صلاحیت میں اضافہ کرے گا بلکہ مستقبل میں کسی خطرے کے لیے بھی تیاری ہوگی۔

انہوں نے کہا کہ حکومت جاپان نے عالمی طور پر کووڈ-19 جیسے نامعلوم وائرس سے نمٹنے کی ضرورت کو سمجھتے ہوئے اپنے تعاون کے حوالے سے بھرپور عزم دہرایا ہے۔

اس سے قبل جاپان نے رواں برس فروری میں پاکستان میں پہلا کیس سامنے آنے سے تین ہفتے قبل تشخیصی کٹس فراہم کی تھی، جس کے بعد عالمی اداروں کے ذریعے 74 لاکھ 10 ہزار ڈالر فراہم کر دیے ہیں۔

اعلامیے میں کہا گیا تھا کہ اس تعاون کا مقصد ‘پاکستان کے عوام کو نوول کورونا وائرس کے اثرات کے خلاف لڑنے کے لیے تیار کرنا ہے’۔

جاپانی سفارت خانے کا کہنا تھا کہ ‘یہ تعاون پاکستان کی کورونا وائرس سے متاثرہ افراد کا فوری کھوج لگانے اور اسی کے مطابق علاج میں مددگار ہوگا’۔

Tags

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close