وبا کی تیسری لہر شدت اختیار کرگئی، مزید 114 افراد جاں بحق
اسلام آباد: کورونا کے وار جاری، جان لیوا وائرس نے آج بھی 114 افراد کو موت کے گھاٹ اتاردیا جب کہ 5 ہزار سے زائد مثبت کیسز رپورٹ ہوئے ہیں۔
نیشنل کمانڈ اینڈ آپریشن سینٹر کی جانب سے کرونا وائرس سے متعلق جاری کردہ اعداد و شمار کے مطابق 24 گھنٹے کے دوران ملک بھر میں کورونا وائرس کے مزید 5 ہزار 50 کیسز سامنے آئے۔
این سی او سی کا کہنا ہے کہ چوبیس گھنٹے میں ملک میں کورونا سے مرنے والوں کی تعداد 114 رہی جبکہ کرونا میں مبتلا ہوکر انتقال کرنے والوں کی مجموعی تعداد 15 ہزار 443 ہوگئی ہے۔
نیشنل کمانڈ اینڈ کنٹرول سینٹر کے مطابق ملک بھر میں گزشتہ ایک روز کے دوران 46 ہزار 66 کرونا ٹیسٹ کیے گئے، ملک میں کورونا کے فعال کیسز کی تعداد 73 ہزار 875 ہو گئی ہے، اس کے علاوہ وبا سے متاثر 4143 مریضوں کی حالت تشویشناک ہے مرض سے صحت یاب ہونے والے افراد کی مجموعی تعداد 6 لاکھ 31 ہزار 700 ہے۔
این سی او سی کے اعداد و شمار کے مطابق ملک میں 24 گھنٹے کے دوران کورونا وائرس کے کیسز رپورٹ مثبت آنے کی شرح 10.96 فیصد رہی۔
