Featuredاسلام آباد

پاکستان دہشتگردوں کی مالی معاونت روکنے کے تمام اقدامات کرچکا: ایف اے ٹی ایف کو بریفنگ

اسلام آباد: پاکستان نے فنانشل ایکشن ٹاسک فورس  (ایف اے ٹی ایف) کو آگاہ کیا ہےکہ اقوام متحدہ کی ہدایات کے مطابق دہشت گردوں کی مالی معاونت روکنے کے تمام اقدامات کرچکے ہیں۔ ایف اے ٹی ایف کا وفد کل رات اسلام آباد پہنچا تھا جو 19 اکتوبر تک پاکستان میں قیام کرے گا۔

پاکستان اور ایف اے ٹی ایف کے ایشیاء پیسیفک کے اعلیٰ سطح وفد کے درمیان مذاکرات جاری ہیں جن میں پاکستان کی طرف سے وزارت خزانہ، اسٹیٹ بینک، سیکیورٹی اینڈ ایکسچینج کمیشن آف پاکستان (ایس ای سی پی)،قومی احتساب بیورو (نیب)، فیڈرل انویسٹی گیشن ایجنسی (ایف آئی اے) اور فیڈرل بورڈ آف ریونیو (ایف بی آر) کے حکام شریک ہیں۔

مذاکرات کے دوران ایف اے ٹی ایف کی ٹیم پاکستان کے دہشت گردوں کی مالی معاونت روکنے کے انتظامی و قانونی اقدامات اور اداروں کی جانب سے ان پر عملدرآمد کا جائزہ لےگی اور 21 اکتوبر تک پاکستان کو گرے لسٹ سے نکالنے یا بلیک لسٹ کرنے کی سفارشات مرتب کرے گی۔

ذرائع کے مطابق پاکستان نے منی لانڈرنگ قوانین میں مجوزہ ترامیم سے وفد کو آگاہ کیا اور مؤقف اپنایا ہے کہ منی لانڈرنگ میں ملوث افراد کی سزائیں بڑھائی جائیں گی۔

ذرائع نے بتایا کہ پاکستانی وفد کی جانب سے ایف اے ٹی ایف کو بریفنگ میں بتایا گیا کہ مجوزہ ترامیم کی منظوری کے بعد پاکستان دوسرے ممالک کو درکار معلومات فراہم کرے گا، ترامیم کابینہ سےمنظوری کے بعد پارلیمنٹ سے منظور کرائی جائیں گی اور ان ترامیم پر اسی سال عملدرآمد ہوگا۔

بریفنگ میں مزید بتایا گیا کہ پاکستان اقوام متحدہ کی ہدایات کے مطابق دہشت گردوں کی مالی معاونت روکنے کے تمام اقدامات کرچکا، سلامتی کونسل کے رولز 1276,1373 پر پاکستان عملدرآمد یقینی بنائے۔

واضح رہے کہ گزشتہ ماہ ایشیاء پیسفک گروپ کے چند حکام نے پاکستان کا دورہ کرکے فائنل مذاکرات کے ایجنڈے کو حتمی شکل دی تھی، جس کے بعد ایف اے ٹی ایف کی سفارشات کی روشنی میں حکومت نے اقدامات مکمل کرلیے ہیں۔

ذرائع کے مطابق حکومت نے ایف اے ٹی ایف کی سفارشات پر ریگولیشنز 2018 میں ترامیم کی منظوری دے دی ہے جب کہ اینٹی منی لانڈرنگ اور دہشت گردوں کی مالی معاونت روکنے سے متعلق ریگولیشنز میں بھی ترامیم کی گئی ہیں۔

علاوہ ازیں حکومت کی جانب سے منی ٹریل کی نشاندہی کے لیے مختلف تجاویز کی بھی منظوری دی گئی ہے اور مبینہ مشکوک مالی سرگرمیوں میں ملوث الرحمن ٹرسٹ نامی تنظیم کو بھی کالعدم قرار دیا جاچکا ہے۔

فنانشل ایکشن ٹاسک فورس

فنانشل ایکشن ٹاسک فورس کے ارکان کی تعداد 37 ہے جس میں امریکا، برطانیہ، چین، بھارت اور ترکی سمیت 25 ممالک، خیلج تعاون کونسل اور یورپی کمیشن شامل ہیں۔

اس تنظیم کی بنیادی ذمہ داریاں عالمی سطح پر منی لانڈرنگ اور دہشت گردوں کی مالی معاونت روکنے کے لیے اقدامات کرنا ہیں۔

عالمی واچ لسٹ میں پاکستان کا نام شامل ہونے سے اسے عالمی امداد، قرضوں اور سرمایہ کاری کی سخت نگرانی سے گزرنا ہوگا جس سے بیرونی سرمایہ کاری متاثر ہوگی اور ملکی معیشت پر منفی اثرات مرتب ہوں گے۔

خیال رہے کہ اس سے قبل 2012 سے 2015 تک بھی پاکستان ایف اے ٹی ایف کی واچ لسٹ میں شامل تھا۔

Tags

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close