اورلینڈو واقعے کی ذمہ داری داعش نے قبول کرلی

 امریکی ریاست فلوریڈا کے شہر اورلینڈو میں ہم جنس پرستوں کے نائٹ کلب میں فائرنگ کے واقعے کی ذمہ داری داعش نے قبول کرلی ہے، واقعے میں کم از کم 50 افراد ہلاک ہوگئے تھے۔

غیر ملکی خبررساں ایجنسی اے ایف پی کے مطابق اورلینڈو کے نائٹ کلب میں فائرنگ کے واقعے کی ذمہ داری داعش کے ترجمان نے ریڈیو بلیٹن سے بات چیت کرتے ہوئے کی۔

البیان ریڈیو کے ایک بلیٹن سے گفتگو کرتے ہوئے داعش ترجمان نے کہا کہ "امریکا میں مقیم عمر متین نامی شخص کو خدا نے اس کام کےلئے منتخب کیا اور خلیفہ کے اس سپاہی نے نائٹ کلب میں گھس کر اپنا کام بخوبی سرانجام دیا، جس میں ہلاک اور زخمی ہونے والوں کی تعداد تقریبا 100 سے زائد ہے”۔

واضح رہے کہ امریکی شہر اورلینڈو میں ہم جنس پرستوں کے نائٹ کلب میں افغان نژاد امریکی شہری عمر متین نے فائرنگ کرکے 50 افراد کو ہلاک اور 53 سے زائد کو زخمی کردیا، پولیس کی جوابی کارروائی میں حملہ آور بھی مارا گیا