بل گیٹس کی شہباز شریف کی قیادت میں حفاظتی ٹیکوں اور پولیو پروگرام کی تعریف

وزیراعظم شہبازشریف سے ورلڈ اکنامک فورم اجلاس کے خصوصی اجلاس کے موقع پر بل گیٹس نے ملاقات کی ہے۔

بل گیٹس نے بطور وزیراعلیٰ شہبازشریف کی قیادت میں حفاظتی ٹیکوں اور پولیو پروگرام کی تعریف کی اور اس طرز عمل کو ملک بھر میں پھیلانے کی تجویز دیدی۔

وزیراعظم شہبازشریف نےبل گیٹس کے ساتھ مل کر کام جاری رکھنے کے عزم کا اعادہ کیا۔ بل گیٹس نے کہا کہ پولیو کا خاتمہ مستقبل کی نسلوں کو مہلک بیماری سے بچانے کیلئے بہت ضروری ہے۔

خیال رہے کہ وزیراعظم شہباز شریف دورہ سعودی عرب کے تیسرے دن آج ریاض میں ایک اور مصروف دن گزاریں گے، وزیراعظم عالمی اقتصادی فورم کے خصوصی اجلاس میں شرکت کریں گے۔ وزیراعظم شہبازشریف اجلاس کے اختتامی سیشن سے خطاب کریں گے، وزیراعظم شہباز شریف کی آج ملائیشیا کے ہم منصب سے بھی ملاقات متوقع ہے۔ وزیراعظم سے تجارت، ماحولیات، توانائی او زراعت کے سعودی وزراء بھی ملیں گے۔