اتحاد بنتے رہتے ہیں سیاست اسی کا نام ہے، چند ہی پارٹیاں اسمبلی تک پہنچتی ہیں

کراچی: الیکشن کی گہما گہمی شروع ہوچکی ہے،حلقہ بندیوں کی وجہ سے انتخابات التوا کا شکار ہوئے ہم نے 3 ماہ انتظار کیا

نثار کھوڑو نے کہا کہ بڑی مشکل سے انتخابات کی تاریخ ملی ہے، ملک میں الیکشن 8 فروری 2024 کو ہوں گے۔

انہوں نے کہا کہ حلقہ بندیوں کی وجہ سے انتخابات التوا کا شکار ہوئے ہم نے 3 ماہ انتظار کیا، الیکشن کی گہما گہمی شروع ہو چکی ہے۔

نثار کھوڑو نے مزید کہا کہ 12 کروڑ ووٹر میں 65 فیصد نوجوان ہیں، جو ووٹنگ میں حصہ لیں اور اپنا کردار ادا کریں ۔

اُن کا کہنا تھا کہ انتخابی مہم زور و شور سے جاری ہے، ہمیں میثاق جمہوریت یاد آتا ہے، یہ معاہدہ 2 پارٹیوں کے درمیان ہوا تھا، جس پر کئی پارٹیوں نے اعتراض اٹھائے۔

پی پی سندھ کے صدر نے یہ بھی کہا کہ ہمارا مقصد تھا سیاست کے خلاف سازش نہ کی جائے، ملک میں میثاق معیشت بھی ہونا چاہیے۔

انہوں نے کہا کہ ایسی منصوبہ بندی کی جائے کہ جسے آنے والی حکومتیں بھی جاری رکھیں، حکومتیں تبدیل ہونے سے ماحول تبدیل ہو جاتا ہے۔

نثار کھوڑو نے کہا کہ کوئی منصوبہ ایک حکومت بناتی ہے تو دوسری حکومت آکر اسے ختم کر دیتی ہے، ملکی استحکام کے لیے سیاسی پالیسی کا ہونا ضروری ہے۔

اُن کا کہنا تھا کہ اتحاد بنتے رہتے ہیں سیاست اسی کا نام ہے، 170 سیاسی پارٹیاں ہیں، چند ہی پارٹیاں پارلیمانی قوت لے کر اسمبلی تک پہنچتی ہیں۔