شاہ رخ نے اپنی بیٹی کے ساتھ فلم میں کام کرنے سے انکار کردیا
بالی ووڈ کے بادشاہ شاہ رخ خان نے اپنی بیٹی سہانا خان کے ساتھ فلم میں کام کرنے سے انکار کردیا ہے۔
ڈنکی اسٹار شاہ رخ خان نے ‘پٹھان’ اور ‘جوان’ میں اپنی پرفارمنس سے مداحوں کو حیران کیا جبکہ اُن کی بیٹی سہانا خان نے اپنی ڈیبیو فلم ‘دی آرچیز’ سے بالی ووڈ میں اپنے کیریئر کا آغاز کیا لیکن اس فلم میں سہانا خان کی اداکاری پر تنقید کی گئی۔
‘دی آرچیز’ کی ریلیز سے قبل کہا جارہا تھا کہ شاہ رخ خان اپنی اگلی فلم میں اپنی بیٹی سہانا خان کے ہمراہ نظر آئیں گے، مداح کنگ خان اور ان کی بیٹی سہانا کو بڑی اسکرین پر ایک ساتھ دیکھنے کے لیے بےتاب تھے کہ اچانک بُری خبر آگئی۔
بھارتی میڈیا کے مطابق سوجوائے گھوش کی ہدایتکاری میں بننے والی فلم میں سہانا نے یتیم لڑکی کا کردار ادا کرنا تھا اور شاہ رخ خان فلم میں اس یتیم لڑکی کو بچاتے لیکن اب اداکار نے اپنی بیٹی کے ساتھ فلم کرنے سے انکار کردیا ہے جس کے بعد یہ فلم غیر معینہ مدت کے لیے تاخیر کا شکار ہوگئی ہے۔
رپورٹ میں بتایا گیا کہ شاہ رخ خان نے اپنی بیٹی کے ساتھ فلم نہ کرنے کا فیصلہ سہانا خان کی ڈیبیو فلم ’دی آرچیز‘ پر ہونے والی تنقید کی وجہ سے کیا ہے کیونکہ وہ نہیں چاہتے کہ آنے والی فلموں میں بھی اُن کی بیٹی کا موازنہ ساتھی اداکاروں سے کیا جائے۔
واضح رہے کہ سال 2023 میں شاہ رخ خان نے اپنے مداحوں کو ایک کے بعد ایک بلاک بسٹر فلم دی، جن میں ’پٹھان‘، ’جوان‘ اور ’ڈنکی‘ شامل ہیں۔
ان سُپر ہٹ فلموں کی کامیابی کے اعزاز میں 10 جنوری کو نئی دہلی میں ہونے والی ایک تقریب کے دوران شاہ رخ خان کو ’انڈین آف دی ایئر ایوارڈ‘ سے نوازا گیا تھا۔
