نکاح کیس: عمران خان اور بشریٰ بی بی کی سزا کیخلاف اپیلوں پر فیصلہ محفوظ

اسلام آباد کی مقامی عدالت نے بانی پی ٹی آئی عمران خان اور بشریٰ بی بی کی دوران عدت نکاح پر سزا کے خلاف اپیلوں پر فیصلہ محفوظ کرلیا۔

ڈسٹرکٹ اینڈ سیشن جج شاہ رخ ارجمند نے دورانِ عدت نکاح کیس میں بانی پی ٹی آئی اور بشریٰ بی بی کی سزاؤں کے خلاف اپیلیں کی سماعت کی۔

شریٰ بی بی کے وکیل عثمان ریاض گل نے دلائل دیے کہ یہ کیس صرف اور صرف سیاسی طور پر نشانہ بنانے کے لیے دائر ہوا ہے، خاورمانیکا کی شکایت تو تقریباً 6 سال بعد دائر ہوئی، عزائم میں بدنیتی واضح ہے، شادی فراڈ ہے یا نہیں ؟ کریمینل کورٹ کے پاس فیصلہ کرنے کا اختیار نہیں، فراڈ شادی یا نکاح کے حوالے سے فیملی کورٹ فیصلہ کرتی ہے۔

عدالت کو بتایا گیا کہ بشریٰ بی بی نے اپنے 342 کے بیان میں کہا تھا کہ طلاق اپریل 2017 میں ہوئی اور انہوں نے عدت کا دورانیہ مکمل کرکے نکاح کیا ، پراسیکیوٹر رانا حسن عباس نے عدالت کو حقائق بتائے، جس پر پراسیکیوٹر راناحسن عباس کو اگلے ہی روز ٹرانسفر کردیاگیا۔

دوسری جانب پٹی ڈسٹرکٹ پراسکیوٹر عدنان علی نے سزا کو برقرار رکھنے کی استدعا کرتے ہوئے دلائل دیے کہ قانون میں کہیں نہیں لکھا کہ اس طرح کے کیسز کا ٹرائل کرمنل میں نہیں ہوسکتا۔

بعد ازاں ڈسٹرکٹ اینڈ سیشن کورٹ اسلام آباد بانی پی ٹی آئی اور بشریٰ بی بی کی دوران عدت نکاح پر سزا کے خلاف اپیلوں پر فیصلہ محفوظ کرلیا جو 29 مئی کو سنایا جائے گا۔

یاد رہے کہ 3 فروری کو بانی پی ٹی آئی اور ان کی اہلیہ بشریٰ بی بی کو دوران عدت نکاح کیس میں سات، سات سال قید کی سزا سنا دی گئی تھی۔

کیس میں سزاؤں کے خلاف سابق وزیراعظم اور بشریٰ بی بی نے عدالت میں اپیلیں دائر کی تھیں۔