پاکستان پیپلز پارٹی نے پی کے 8 کے ضمنی انتخاب کے نتائج تسلیم کرنے سے انکار کر دیا

پشاور: پاکستان پیپلز پارٹی نے پی کے 8 کے ضمنی انتخاب کے نتائج تسلیم کرنے سے انکار کر دیا ہے۔ تفصیلات کے مطابق پی پی پی رہنما رحیم داد خان کا کہنا ہے کہ پی کے 8 ضمنی انتخاب کا نتیجہ ناقابل قبول ہے۔ رحیم داد خان نے کہا کہ الیکشن سے قبل ہی دھاندلی کے خدشے سے آگاہ کر دیا تھا۔واضح رہے کہ پی کے 8 کی نشست مسلم لیگ ن کے ارباب اکبر حیات کی وفات کے بعد خالی ہوئی تھی جس پر 12 مئی کو ضمنی انتخاب کے لیے پولنگ کروائی گئی۔ ضمنی انتخاب میں ایک مرتبہ پھر مسلم لیگ ن ہی نے میدان مار لیا جس پر پیپلز پارٹی نے دھاندلی کا الزام عائد کرتے ہوئے نتیجہ تسلیم کرنے سے صاف انکار کر دیا ہے۔