فائرنگ سے چند گھنٹوں میں دوافراد ہلاک، 8 زخمی
شہر کے مختلف علاقوں میں فائرنگ کے واقعات پیش آئے ہیں، محض چند گھنٹوں میں فائرنگ سے دو افراد جاں بحق اور 8 افراد زخمی ہوگئے۔
پولیس کے مطابق لیاری بہار کالونی میں نامعلوم افراد کی فائرنگ سے ایک شخص جان کی بازی ہارگیا۔ مقتول کی شناخت بسم اللہ خان کے نام سے ہوئی۔
نارتھ ناظم آباد حیدری کے قریب فائرنگ کے واقعے میں ایک شخص جاں بحق اور ایک زخمی ہوا، مقتول کی شناخت ادریس اور زخمی کی شناخت حسین کے نام سے ہوئی۔
اسی طرح بریگیڈ تھانے کی حدود میں تاج کمپلیکس کے قریب ہوٹل پر نامعلوم مسلح افراد نے فائرنگ کردی جس کے نتیجے میں وہاں موجود تین افراد زخمی ہوگئے جن کی شناخت نذیر، حبیب اور اشرف کے ناموں سے ہوئی، پولیس کے مطابق مسلح افراد کی تعداد تین تھی جو دو موٹرسائیکلوں پر سوار تھے۔
بلدیہ کے علاقے میں بھی فائرنگ ہوئی جس میں ایک شخص زخمی ہوا اور کورنگی ابراہیم حیدری میں بھی فائرنگ سے ایک شخص زخمی ہوگیا، اسی طرح دیگر علاقوں میں بھی فائرنگ سے دو لوگ زخمی ہوئے ہیں۔
