پر امن احتجاج سب کا حق ہے لیکن انتشار پھیلانے کی کسی کو اجازت نہیں : شیری رحمان

اسلام آباد : عمران خان کی سوچ اور سیاست غلام ہے، ڈیل نہ ملنے کی صورت میں انہوں نے شورٹ مارچ کا اعلان کیا۔

وفاقی وزیر برائے ماحولیاتی تبدیلی سینیٹر شیری رحمان نے سماجی میڈیا پر جاری بیان میں کہا کہ حقیقی آزادی کا مقصد ہے۔ مجھ سے ڈیل کرو اور مجھے اقتدار کی کسری پر بٹھاؤ ہے۔ ملک آزاد اور عوام با شعور ہیں، اس ملک میں اگر کچھ غلام ہے تو وہ عمران خان کی سوچ اور سیاست ہے۔

انہوں نے کہا کہ پر امن احتجاج سب کا حق ہے، لیکن اسلام آباد میں انتشار پھیلانے کی کسی کو اجازت نہیں ہوگی۔ ‏اب جب ملک اپنی درست سمت میں واپس جا رہا ہے۔ خارجہ تنہائی ختم ہو رہی تو عمران خان انتشار پھیلانے اور اسلام آباد کو یرغمال بنانے کیلئے آ رہے ہیں۔

پیپلز پارٹی سینیٹر نے کہا کہ ان ہی کے رہنماء نے دعویٰ کیا ہے پی ٹی آئی کے لانگ مارچ میں لاشیں گریں گی۔ کیا یہ لاشیں گرانے آ رہے ہیں؟ کیا عمران خان یہی چاہتے ہیں؟ ‏اگر درست ہوا تو اس کا ذمہ دار کون ہوگا؟

شیری رحمان کا کہنا تھا کہ عمران خان رات کے اندھیروں میں اداروں کے سربراہان سے ڈیل کے لئے پیر پکڑ رہے تھے اور دن میں ان کا گریبان۔ ڈیل نہ ملنے کی صورت میں انہوں نے شورٹ مارچ کا اعلان کیا۔ حقیقی آزادی کی آڑ میں ذاتی سیاسی جنگ لڑی جا رہی ہے۔