امریکی اتحادی افواج کا شامی شہر’’رقہ‘‘میں آپریشن کا اعلان

کرد اور عرب افواج نے عام شہریوں کو خبردار کیا ہے کہ وہ ایسے مقامات سے دور رہیں جہاں داعش کے جنگجو موجود ہیں۔

خیال رہے کہ شام کے شہر رقہ میں یہ آپریشن ایسےوقت میں کیا جارہاہےجب عراق میں داعش کے مضبوط گڑھ موصل میں امریکی اتحاد میں شامل عراقی فوج آپریشن کررہی ہے۔

یاد رہے کہ شام کے شہر رقہ پر داعش نے 2013 میں صدر بشار الاسد کے مخالف باغیوں سے قبضہ حاصل کیا تھااور 2014 میں داعش کی جانب سے خلافت کا اعلان کرنے کے بعد سےدارالحکومت قرار دیا گیا تھا۔

واضح رہے کہ ایک اندازے کےمطابق اس وقت شام کے شہر رقہ میں تقریباََ ڈھائی لاکھ سے پانچ لاکھ شہری اس شہر میں رہائش پذیر ہیں اور خدشہ ظاہر کیا جارہا ہے کہ داعش کی جانب سے ان شہریوں کو انسانی ڈھال کے طور پر اتحادی افواج کے خلاف استعمال کیا جاسکتاہے۔