اس وقت بی جے پی فرقہ وارانہ تعصب اور نفرت کا وائرس پھیلارہی ہے

فرقہ وارانہ وائرس پھیلانے کے بیان پر سونیا گاندھی کی مودی پر تنقید

سونیا گاندھی نے کہا ہے کہ جب ہمیں کورونا وائرس سے نمٹنا چاہیے اس وقت بی جے پی فرقہ وارانہ تعصب اور نفرت کا وائرس پھیلارہی ہے۔

کانگریس کی صدر سونیا گاندھی نے کہا ہے کہ گزشتہ 3 ہفتوں میں کورونا وائرس خطرناک طریقے سے پھیلا ہے اس حقیقت کے باوجود حکومت نے طبی ماہرین اور اپوزیشن اراکین کی تجاویز پر صرف جزوی اور غلط انداز میں عمل کیا۔

انہوں نے مزید کہا کہ مودی حکومت ایک ایسے وقت میں ہمدردی اور لچک ظاہر کرنے میں ناکام ہوگئی جب کئی افراد لاک ڈاؤن سے شدید متاثر ہوئے ہیں۔

سونیا گاندھی نے کہا کہ اس سے ہماری معاشرتی ہم آہنگی کو شدید نقصان پہنچا ہے، اس نقصان کو ٹھیک کرنے میں ہمیں اور ہماری پارٹی کو سخت محنت کرنی ہوگی۔

انہوں نے کہ وزیراعظم نریندر مودی کو کئی مرتبہ تعمیری تعاون کی پیشکش کی تھی اور مختلف خطوط پر محنت کشوں کی مشکلات دور کرنے کی تجویز دی تھی۔

سونیا گاندھی نے کہا کہ بدقسمتی سے ان تجاویز پر صرف جزوی طور پر عمل کیا گیا، حکومت کی جانب سے جو تعاون، ہمدردی اور تیزی دکھائی جانی چاہیے تھی اس کی کمی واضح ہے۔

کانگریس کی صدر نے تجارت، کامرس اور صنعت رکنے کے بعد غیر منظم شعبے کے ورکرز، کنسٹرکشن ورکرز، مزدوروں، کسانوں اور کھیت کے مزدوروں کو درپیش مشکلات پر بات کی۔

انہوں نے کہا کہ مرکزی حکومت کو واضح اندازہ نہیں ہے کہ 3 مئی کے بعد صورتحال کو کیسے سنبھالا جائے گا۔