ہیلری کلنٹن نے ہوائی جہاز میں سالگرہ منائی

امریکا میں صدارتی انتخابات کی مہم آخری مراحل میں داخل ہوچکی ہے۔ صدارتی امیدواروں کی ووٹرز کی حمایت حاصل کرنے کی کوششیں بھرپور طریقے سے جاری ہیں۔ ڈیمو کریٹک پارٹی کی صدارتی امیدوار ہیلری کلنٹن نے انہترویں سالگرہ ہوائی جہاز میں منائی۔

اس موقع پر میڈیا کے نمائندوں کو کیک پیش کرتے ہوئے ہیلری کلٹن کا کہنا تھا کہ جہاز میں سالگرہ منا کر وہ انتہائی خوش ہیں۔ انہوں نے کہا کہ آئندہ 2 ہفتے تک ان کی تمام تر توجہ انتخابی مہم اور ریاستوں میں ہونے والے انتخابات پرمرکوز رہے گی۔

ہیلری کلنٹن نے ڈونلڈ ٹرمپ پر ایک بار پھر تنقید کرتے ہوئے کہا کہ صدارتی انتخابات میں کچھ دن باقی رہ گئے لیکن ٹرمپ تاحال اپنا زیادہ تر وقت انتخابی مہم کے بجائے اپنے کاروبار کو دے رہے ہیں۔

دوسری جانب ڈونلڈ ٹرمپ کی مخالفت ہالی وڈ بھی پہنچ گئی۔ ہالی وڈ کے مشہور زمانہ واک آف فیم پر نصب ٹرمپ کے نام کے ستارے کو نامعلوم افراد نے نقصان پہنچایا اور اسے تباہ کردیا۔